ОРОСЫН ХОЛБООНЫ УЛСАД АЖИЛЛАЖ, АМЬДАРЧ БАЙГАА СУДЛААЧИД “БОЛОМЖ-ШИЙДЭЛ” ЭРДЭМ ШИНЖИЛГЭЭНИЙ ХУРАЛД ОРОЛЦОВ
Монгол Улсаас ОХУ-д суугаа Элчин Сайдын Яамнаас зохион байгуулсан “Боломж-Шийдэл” эрдэм шинжилгээний хурлыг 2025 оны 3 дугаар сарын 28-ны өдрийн Баасан гарагт Элчин Сайдын Яамны Хүндэтгэлийн өргөөнд зохион байгууллаа.
Боломж–Шийдэл эрдэм шинжилгээний хуралд Онц бөгөөд Бүрэн эрхт Элчин Сайд, Түүхийн ухааны доктор Ө.Энхтүвшин нээж хэлсэн үгэндээ Бүс нутгийг хамарсан өнөөдрийн эрдэм шинжилгээний хуралд манай монгол улсын улс төр, эдийн засаг, бусад нийгэм оюуны асуудалд хэрхэн яаж нөлөөлөх вэ гэдгийг судлан, олон асуултын шийдэл гарцыг олох цаг хугацаанд болж байна. Хурлаас эдгээр асуудалд судалгааны боломж шийдлийг нэгтгэж, яам тамгын газар, шинжлэх ухааны академи болон, холбогдох байгууллагуудад санал, зөвлөмжөө хүргэсэн үр дүнтэй хурал болно гэдэгт итгэж буйгаа илэрхийлж, хуралд оролцогчдод амжилт хүссэн болно.
Эрдэм шинжилгээний хуралд ОХУ-д ажиллаж, амьдарч буй 30 гаруй эрдэмтэн судлаачид оролцож, Москва хотын Олон Улсын Хөрөнгө оруулалтын банкны дэд захирлаар ажиллаж байгаа Эдийн засгийн шинжлэх ухааны доктор Д.Моломжамц “Зах зээлийн харилцаа гүнзгийрэхийн хирээр Монголын нийгэм, эдийн засгийн хөгжилд тулгарч байгаа зарим асуудал”, Москва мужийн Дубна хот дахь Цөмийн шинжилгээний нэгдсэн институтийн доктор Д.Сумхүү, Ц.Цогтсайхан нар “ИБР-2М судалгааны реакторын динамикийн судалгааны зарим үр дүн”, А.Бадмаараг докторант “Ган дээжний үлдэгдэл, харьцангуй дифракцын аргаар судлах нь”, Москвагийн техникийн Н.Э. Бауманы улсын их сургуулийн докторант Б.Энхжаргал “ОХУ болон бусад улс орнууд дахь интеграл схемийн эвдрэлийн эрчмийн тооцооны аргуудын дүн шинжилгээ”, Эрхүү хотын улсын их сургуулийн докторант Б.Рэнцэнханд “ Орчин үеийн Монголын боловсролын тэргүүлэх үнэт зүйл”, Эрхүүгийн Байгаль улсын их сургуулийн докторант Б.Байгалмаа “Монголын бизнес эрхлэгчдийн өнөөгийн нөхцөл байдал, сайжруулах боломж”, Москва хотын Дипломат академийн докторант Элчин зөвлөх Д.Өнөбилэгт “Олон улсын харилцааны өнөөгийн нөхцөл байдлын талаар” зочин илтгэлээр, Москвагийн Эрчим хүчний их сургуулийн докторант Д.Амармөрөн, Б.Мягмаргарав нар “ДЦС-уудын хаягдал усыг дахин боловсруулах”, “Монгол Улсын эрчим хүчний системд тулгамдаж буй асуудлууд, хөгжлийн гол сорилтууд ба стратегийн хандлага”, Москвагийн Багшийн их сургуулийн докторант Ш.Саранчимэг “Үлгэр яагаад унших хэрэгтэй вэ?”, Дотоод хэргийн яамны харьяа Удирдлагын академийн докторант У.Батнасан “Киберь гэмт хэрэгтэй тэмцэх шийдвэр гаргахад дэмжлэг үзүүлэх олон нийтийн сүлжээний шинжилгээний арга загвар” зэрэг илтгэлүүдийг тус тус тавьж, хэлэлцүүлэв.
Энэхүү ЭСЯ-ны санаачилгаар Москва хотноо анх удаа ОХУ-ын их, дээд сургуульд сурч буй монгол судлаач, докторантуудын дунд зохион байгуулсан “Боломж-Шийдэл эрдэм шинжилгээний хурал” нь цаг үеэ олсон чухал хурал болсныг хуралд оролцогчид онцлон тэмдэглэж, хурлын дүнг нэгтгэн Монгол Улсын Гадаад харилцааны яам болон холбогдох яам, байгууллагуудад холбогдох санал, зөвлөмжийн хамт хүргүүлэхийн зэрэгцээ цаашид тус хурлыг жил бүр тасралтгүй зохион байгуулахаар тогтсон байна.